In memoriam Claar van Lier:

Het gezin van Sjir en Lies waas neet anges as anger families in Ell en ómgaeving. Sjir wirkdje hel óm de mondjes te voeden en Lies zörgdje veur het gezin. Ze zörgdje samen det de kinjer koste opgruje in ein veilige omgaeving .

Claar ging nao de lieëgere sjoeël nao de mulo in Thoeër. Ze kos bèst good lieëre. In deze tied waas ze lid van de MBL  en zóng ze in het dameskoeër Avanti. Nao de mulo ging ze nao de KLOS in Eindhoven. Nao 2 jaor is ze gestopt. In de periode daonao waas ze zoekende en kwaam nao get baantjes hiej en dao op de Boerenleenbank terecht hiej in Ell. Ze bekwaomdje zich in administratief werk en haaj dao väöl plezeer aan. As extraatje deej ze ouch nog de bookhaojing bie Lei vanne Weef in Haler en veur autogarage Corstjens in Hunsel.

Wirke oppe Rabobank waas heur lust en heur laeve. Ze deej dit werk zoeë gaer det zelfs de bankeuvervallers van de bank in Hunsel heur neet koste vinje toen ze ónger de taofel wègdook en aan de bein van die men kos zeen waat ze aan het doon wore. Bie de euverval in Kelpen duudje ze nog gauw de kloesdeur toe veurdet ze nao boete rendje.

Al tamelijk vreug ging Claar op vrijersvoeten. Thieu waas heur ieërste en einige liefde; nao de vriejerstied höbbe ze het same mieër den 50 jaor oetgehaoje. 

De toekomst vol meuglijkheden laag veur heur en ze genote van het laeve. Toch haaj Claar ouch dudelijke winse. Thieu kos neet danse en zie vónj det hae det waal móst lieëre. Op de gouden broeloft in juli veurig jaor krege wae ein perfecte demonstratie veurgesjoteldj en waerdje de tango mèt passie gedemonstreerdj.

Op 28 juli 1972 zeen ze getroudj en ginge woeëne in het aojershoes van Thieu.

In 1973 waerdje Thieu en Claar prins en prinses van het riek van de Moeërebuuk. 

Claar leet zeen det ze erg good kan en wiltj zörge veur anger minse. Lange tied zörgdje ze veur tante Marie en ome Neel en weer eine tied later trokke pap Sjir en mam Lies in in het achterhoes. Det zörge deej Claar kundig en met väöl passie.

Vanaaf de geboorte van Roy in 1975 bleef ze thoes óm veur het hoeshaoje te zörge. Ze besteedje erg väöl energie aan de opveujing van heur kinjer Roy en Marco en inkele jaore later deej ze det ouch nog veur Maud, die zoeë óngevieër ein dochter waas.

De vakanties in Oostenriek loupen as ein roeëje draod door het laeve van Claar en Thieu. Ze kwome oeëts in Längenfeld terecht bie ein soort B&B van de familie Falkner. Met de gasthieër en gastvrouw, Albert en Maria, kregen ze eine geweldige klik en det zörgdje d’r veur det ze óngevieër eder jaor dao op vakantie gingen. Weer 40 jaor later waerdje ze gehuldigdj as ieërebörgers van Längenfeld. Heur kinjer höbbe ’t Oostenriek-virus euvergenómme.

Ein belangriek puntj in het opgruje van kinjer vónj Claar de belangstelling veur muziek. Veur Claar waas  eine wins óm häör aafsjeiddeenst mèt “echte” (life)-blaosmuziek op te loestere en aan die wins kómme wae gaer tegemoet.

Ze waas ein perfecte gastvrouw veur de familie en ouch bie de seniorenvereiniging in Ell nóm ze de rol van gastvrouw gaer op zich. Ze organiseerdje ein vakantie nao Frieslandj veur óngevieër 40 minse en ging van te veure zelf mèt Thieu ter plekke alles regelen. Dao mós niks mis kinne gaon. Ein anger passie waerdje in de pensionadotied het bridgen. Claar as oma deej alles waat ze mer kins bedinken veur heur kleinkinjer. Niks waas häör te väöl.

Oet alles bliektj waal, det wae mèt z’n allen Claar hieël erg gaon missen. Toch zulle wae same eine weeg vinje óm häör gemis op te vangen. Ich wins alles en ederein dao in hieël väöl sterktje!